Dva tila i jena duša

Za ocon, kus mene je partilo šnjin
Za Tobon, brat moj, partilo je sve.
Karčun deboto ne duperivan
Niman ni laz, ni lesu.
Štorije ne puvidan drugo
Ti si bija prvi ki je je čuja, a Tvoju san prvu čula ja.

Papagalo je uša h Červari i ni se turna'.
Naša rana čerišnja je usahla
Pu česti pasivaju, ma ne zasviru kako ti.
Kružere kadi san Te čekevala, drugo ni.
Turta za rožendan i prve rože, je samo prelip rikordo.

Gledan našu zikvu
Tvoj gramofon i zadnjega medvida
Pensan na prvu Pony bičikletu.
Nosin Tvoje rančine.

(Križ je bija poša za Lovran)
Ja šepljen, ma se šapuntan
Se movin i se levan
Lipo se ubučen-kako si mi reka
Da me gledaš-znan.

Dopren i zapren armeron i tvoje uknice.
Na banku za pisati držin tri debele Bibilije.
U kužini zgor glave Tvoju zadnju sliku-zadnji put da me je niki čepa okuli vrata.
Pensan na naše vijađe i sva mora kuje si mi kaza'
I na svu ljubav kuju si mi dava'.

Držin sve rikorde kuji su mi još ustali.
Ne vidin uru da Te bukin kako kad smo Te imali.
Bude u hiži niki vitar. Nazdrhnen se sva.
Tako budemo skupa-samo Ti i ja.