Saka asocijacija va koj je do sada bila Hrvocka je propala, pa će i Evropa

Posluhali smo celo leto prepucavanje naših batići, od precjednika države do premjerke i seh mogućeh naših „veličinah“ zi Sabora ki će potpisat, biju oni rekli, kontrat z Evropu. Sada pred some nove izbore su se valja dogovorili da će tu kapitulaciju Evropi potpisat i precjednik i sadašnja premjerka!

Baš lipo, si kuntenti cveteju i jedon i drugi. Sada su izbori i takovu stvor si pomalo pravivaju koristit za dobit kakof punat poli naroda, ma kako su stvori portile s tu Evropu, fato će već ovi mandat Sabora spravljat kako tornat zi te sejne Evrope, a ko se već i ne respade va ten vrimeni naše „čekaonice“, ka će još trajat do 2013. leta.

Ja, ču san da je va Grčkoj sada najveći hit pjesma od naših Gustafi, „Kadi su ta vrata, kroz ka san pasa – ja bin se torna!“ Sada su već i Nemci počeli govorit da bi tornali svoju marku, Grci biju tornali svoju drahmu, pa i šli vonka, samo da moru – a mi se još vajka rivamo i rivamo nutra.

Jedina nada nan je da je saka asocijacija va koj je do sada bila Hrvocka – propala, pa će i ta Evropa. Spametimo se kako je to bilo z Autro-Ugarsku, pa pokle z Prvu i Drugu Jugu! Sada je na redu Evropa, pa pokle valja više jedinemu neće prit na pamet da nas zove, a valja ćemo i somi pomalo počet kapit da  bi bilo dosta tih monadah od „udruživanja“.

Ako somi ne moremo riješit svoje probleme, nanke drugi nan ih neće riješit. Vrh-vrha apsurda je kad san ove dneve ču, kako su pred somo potpisivanje spomenutega kontrata, upozorenja Hrvockoj poslale Rumunjska i Bugarska. To forši nebi robilo ni komentirat, aš čovik ne zno ako bi se smijo, ako bi plaka – kad to čuje.

Va saken slučaji, pred ove izbore, ki su baš ove dneve pred nami, se ćakulo ki će potpisat „kontrat“ ili bolje reć ultimatum Evropi, za druge izbore će pred nami bit štorija ki će potpisat za poć vonka, a forši čeju to bit i sejne face, a mi ćemo njin i sada i oni put pljeskat.

Z drugega kraja, niki Eu-batići su sada počeli forcat i ubrzavat te naše zadnje korake va Eu-provaliju i tega me je pomalo stroh, da ti Eu brod, ki pomalo već tone – ne potegne zadnji moment i nas zad sobun. Znon da niki misli da smo mi već potonuli, ma domislimo se samo Slovačke, ka sada spašava Grčku. Kako bi jutri izgledalo da Hrvocka spašava Toliju, Portugal ili Španiju? Ne zobimo, da koliko godar da je slabo - za huje je vajka još zustalo mesta.

San trefi niki don jenega storega Hrvota, niki praviju da ima priko miljar let. Sa je bi nikako žalosan, uplačen, suze su mu se vrtile va očijah. San pomisli da je čoviku slabo, san ga pito da ča mu je, da ča se je trefilo? Brižan stori mi je reka da je on dobro, je – ma da mu je duša bolna i žalosna. Je reka da je miljar let čeka ovu svoju novu hrvocku državu i kad je pomisli da je je konačno dočeka, nju su ovih dvajset let imali samo niki i to samo zose. Sad kad valja više ni ča za orobit, ti sejni niki pretvaraju Hrvocku va Eu-vazala. Kukulele, kukuriku, kukunama. (Klaudijo Lazarić)