Kako je gospodin Kajin posta drug Kajin
Brižni mi, ki živimo va ovoj brižnoj Hrvockoj! Pasali su nan ovi veli blagdani, Božić i Novo Leto i baš oni, ki su nan tribali stavit malo melema na naše bolne rane – na te rane su nan stavili soli, neka nas još bolje peku. Kardinal Bozanić i ministar Jovanović su se va te praznične dneve tuta forca prehtali ki je brižnemu puku pokvori blagdane. O ministru Jovanoviću nebin troši besede, on bi moga bit glavni favorit za budućega ministra nekulture. Moran samo reć da poli više od 350 miljari ljudi prez dela, ljudi va Vladi troše svoje moždane vijuge na rasprave ako je školonon korisno drkat. Valja po sebi sudiju, aš nas već drkaju više od leto don i se njin to dobro i lipo pasiva.
KRAGULJI BOZANIĆ I JOVANOVIĆ
Ja, da je kardinal baren malo svoje energije potroši na niken drugen kraji – mi va Istri bimo danas imali još svojega biškupa. Dobar pastir ni oni ki samo šiška svoje vosce i ki hi muze, on bi hi mora čuvat od slabega oblaka i munjenih ljudi, mora bi za svoje vosce imat i jato i imat hrone i napoja – ako smo se kapili.Uglavnom, prostor za blagdane Božića i Novega Leta su okupirali kragulji, a narodu bi bolje prišla jena dobra kokoš za juhu nego kragulji kakovi su se pokozali Bozanić i Jovanović. Ti kragulji su pozobili da je za Božić lipo poželjit puku mir i dobro, pa ih za drugu blagdansku priliku molin za razumijevanje.Milanović se još vajka ponaša više kako partijski sekretar nego kako precjednik vlade va državi ka saki don se više tone i tone. Sejno njega to ne smeta da se više steže vrot i da propovida stvori kako i ča bi tribalo storit, a da još vajka ni jenu ni stori ni dokazo. On je od Kukuriku koalicije stori kukulele koaliciju, posvadi se je z partneri – kad već ne more iskat krivca va HDZ-i. Moramo se va ovoj priliki domislit i stvori ke su se dogodile pred 10 let nazad, kad je opet SDP raskupusa svoje ondašnje koalicijske partnere. Ta stranka, potomak stranke iz jednoumlja fato je zustala va jednoumlji i na višestranačje se ne more navadit. Mislin da je Milanović na šegavo pravo skrenut pažnju javnosti, pa jeno vrime jedini neće spominjat 350 miljari ljudi prez dela, jedini neće spominjat opću bijedu i mižeriju va ku hodimo na halop, samo se govori o nikoj „novoj forci“ ka se zove Kajin. Običan puk ni rivo vidit brzu transformaciju va koj je gospodin Kajin posta drug Kajin. Kao svoj argument za podršku drugu Kajinu SDP je reka da se Kajin zalaže za prava običnih ljudi. Viš vraga, bit će da smo mi va okruženji Rockwoola joko neobični i za Kajina i za SDP, ki ga podržava, aš je baš Kajin reka da će bit srićna saka mat koj dite bude delalo va Rockwooli - nabijen ga na… njega i njega. Mi tu okoli Kršana i Pićna smo po drugu Kajinu prilično neobični – za naša prava na život se drug Kajin ne triba zalagat. Ma razguli sine Damire, đe su u tvojoj priči naši, a đe vaši?
LUD, ZBUNJEN, NORMALAN
Pusmo mi ća ove vele nacionalne teme, pozabavimo se mi malo z svojimi domoćimi temami. Imamo mi svoje kazalište „Lud, zbunjen, normalan“, samo ča bimo one normalne morali z dobru lampadinu iskat. Va onoj seriji je najveć brižan stori Izet protuka, a ude poli nas ih je preveć protuklo da bimo hi nabrojali. Va onoj seriji je sin Damir vela budućnost, poli nas mi se paro da je Damir najviše protuka.
Don zad dnevon nan Kajin servira štorije kako je dosadašnji župon imo posla z Sanaderon, kako je imo posla z HDZ-on, kako je kupiva sela i grode, kakova je bila politika Istre i IDS-a va zadnjih deset let i som ne znon ča ni se nabroji. Ljudi moji, jeli to moguće čut takove štorije od Kajina, pa som on je seh teh dvajset let bi najjača spona va sveistarskoj stranki i baš zato je za vraga besramno dokazivat sada niku naknadnu pamet. Ma razguli sine Damire, da nisi neđe lupio glavom, pa ti se pamet vratila?
Pred dvajsetak let je SDP bi kako niki branik i zaštitnik Istre, a danas je baš SDP navali na Istru, jednako kako HDZ 90-ih let pasanega stoljeća. Kako SDP-ovci va Istri svoje force nisu nikad našli dosta, pozvali su janjičare u pomoć. To su uglavnom niki nezavisni ili „nezavisni“ – novi ili od prvo odpadnici od IDS-a, ke je „Naš Damir“ regrutira u frontu kontra! Koliko su ti janjičari pod bandijeru SDP-a i pod komandu Kajina joki pokozat će vrime, ja se šperon da će se i SDP va Istri i Kajin zasprovega kojenat.S Kajinon je anke Herak i nakon sega ča smo od Kajina o njemu čuli i sada Herak va niken đornali priko por stranic piše pod naslovon: „Moja istina“. Ma razguli sine Damire, nemoj mi reć da i ti tu „istinu“ potpisuješ?!
PENZIONER NA JEDON DON
Pred niko vrime nan je Damir bi kandidat za prešidenta Hrvocke, priznajmo - ni imo prevelu podršku svoje stranke - nanke Nineta. Sada pokle parlamentarnih izbori, se je Damir valja špero da će ga Nino porivat za potprecjednika Sabora – ni to mu ni šlo zad ruku. Bit će da je to najveći Ninetov grih radi kega se je Damir obrnu proti svoje stranke, Nineta i Istre – tako bi Damir reka za bilo kega drugega va toj situaciji. Ja san forši malo nediplomat, ma moran reć da za ovu priliku da čovik ki ni bi ni precjednik svoje Mjesne zajednice, ni kućnog savjeta –najedanput bi uti bit župon ili čak precjednik države – čudno je to malo zome, škužojte. Još kad se domislin da je Damir šo va penziju na jedon don, pa se torno na „funkciju“ i sada non drži predike o moralu… Ma razguli sine Damire, lako tebi, ali đe je još naša penzija!
Kako se ćuti prosječan Istrijon ki je Kajinu verova kako dežurnen antifašisti, lokalnemu „Gargamelu“ ki je počisti se zi IDS-a - se ča ni bilo istrijonsko. Bi je za nike Istrijane Damir i najtrji kunfin Istre prema Hrvockoj! Bi je Kajin i njaveća opozicija sadašnjoj vladi, iako je njegova stranka bila kus te sejne vlade. I baš sada kad je ta kukuriku vlada pokozala su svoju nemoć i se svoje promašaje – najedanput se je Kajin obrnu va najvećega Milanovićevega zagovornika va Istri. Ma razguli sine Damire – ne laje pas radi sela, nego radi sebe!
ZA KAJINA JEDINI ISTRIJON NE VALJO
Samo do čera Kajin je straši Istrijane z babau Istrijanima, pa su se med njimi kroz vrime našli Delbianco, Žufić, Herak, Mario Blečić, Folo… na kraji i Branko Ružić. Sada je sin tin babau Istrijanon Kajin najprvo oprosti grihe, pa ih pozva pod novu zastavu. Do sada je govori kako ne smiju va Istri zapovidat „oni zi Zagreba“ – sada govori da je za Istru spas va Zagrebi. Tako nan je na kraji som Kajin od istrijonskga kunfina posta istrijonski babau. Ma razguli sine Damire – čudno se s tobom nešto dešava, drkaš pojmove čovječe, ne prepoznajem te!
Vidili smo, Kajin je badono svoju stranku SIS (SveIstarkuStranku) - ni potribe plakat zad prolijenin mlikon. Samo više ni pod bandijeru pod ku je šo va Sabor imora kambijat i klub va Sabori. Ako ga SDP riva za župona, valja bi bila logika da gre va njihov saborski klub. Istina tamo će se moć navadit i ča je demokracki centralizam i kako se muči, pa ćemo verovatno zgubit va budućnosti ništo od njigove saborske galame i folklora. Spametimo se, va sličnih prilikah je Kajin vapi na svoje kolege neka tornoju mandat, aš mandat pripada stranki. Zoč to pravilo ne valjo i za Kajina i zoč on ne torno mandat svojen partitu - ni nan do sada objasni. Ma razguli sine Damire, pročit'o sam već taj bukvar!
DVAJSET LET SICILIJE I KALABRIJE
Kajin nan obećiva da va idućih dvajset let jedini neće kupivat sela po Istri, kako se va idućih 20 let z Istru neće upravljat kako z Siciliju i Kalabriju. Va sejno vrime nan govori kako je „niki“ pred 20 let kupi niko selo va Istri kadi je još i on bi svidok za zajam, pa je sih tih dvajset let mučo. Va sejno vrime baš je Kajin bi No2 va soj vlasti Istre va koj se je, po njigoven, upravljalo kako va Siciliji i Kalabriji, alora kakova nan se promjena to sada nudi? Korito vajka sejno, oni ki ga pune vajka sejni – samo oni ki s njega hlapaju bi se kambijali. Ma razguli sine Damire, kakva je ovo ponuda?
Da nebi ki, ne daj Bože, pomisli kako ja bronin i zagovaran Nineta. Samo Nino je doktor politike prema Kajinu, prefrigani diplomata. Govori se političke zajike. Ako triba laje, ako triba bleji, ako triba mijauče, ako triba škviči. Kajin nan je vajka jodan, škriplje z zubi pront vajka da nikega uji. To jeno vrime more i pasivat, ča je preveć ni nanke s kruhon dobro. Razguli sine Damire – zašto baš ti uvijek moraš biti u pravu! (Klaudijo Lazarić)
