Adriana i Zvane Istriansky kako dva golubića

Zvane Istriansky se je pokozo kao provi, istina još mu ne pišemo poli imena ono „pl.“, ma je na dobren puti. Kako je ovo leto samo prima goste, tendi hi i lipo odprovljo propjo je za pofllit ga. Najviše mi se je pježalo kako je ono bi dobar domaćin kad je va Istri bila Adriana Hadezeyska. Bili su skupa i na tenisi va Umagi i na Briunih, a va Puli su skupa zaključili da jebolnica veli istrijonski problem i vela sakodnevna potriba istijonskega puka. Ja, ni Adriani nismo još stavili „pl.“, baš smo mi niki nezahvalan narod.

ADRIANA & ZVANE ISTRIANSKY

Milo mi hi je bilo vidit kako dvo golubića, kako se ono jedon drugemu smijulje i meškolje. Adriana je rastegnula smih od uha do uha, a niki govore da njoj je naš Zvane zajno zakanto onu našu „Ona ima bile zube – bjonda je“. Bili su oba kuntenti i Boh i zaključili da jebolnica najveći prioritet Istre i Hrvocke i da na toj temi moraju skupa delat.

Nebi bilo va reguli da se njih dvo sada najedanput gledaju popriko i to samo zato ča niki tamo zi Letuća na to ne gledaju baš lipo. Pa bi je naš Zvane dobar, ma i više nego dobar z pokojnen Franeton, pa z Iveton, pa sada da se ne daj Bože svadi z Adrianu, bi mu niki reka da je peder, a on mi baš ne spodobi na tu šagomu. Zvane Istriansky je va ovoj Hrvockoj imo vajka niko posebno mesto, pa mu ni jedini zamiri nanke kad je šo ća od pokojnega Molega Ivice zi one koalicije, nikin drugin je takova stvor zamljena za velo zlo. Kapin da je Zvane bandono Ivicu, a mora je za radi storih računi z Franeton. Naši stori su znali reć da ni lumbrela za jedan doš!

Stori dobri Pomet je pred stotine let reka da se z vrimenon triba akomodavat, da triba bit virtuoz i naš Zvane je provi virtuoz - se leta od kad je va Hrvocku prišla demokracija njemu se dobro stoji, čovik se drži vajka blizu ugnja. Ne verujen da će se ča kambijat z krajen ovega leta – vlih je sada va najboljih letah! Ki bude od potribe – poli Zvaneta se more pomoć, amen!

Alora Adriana i Zvane, kao provi Evropejci siguro su va svojen diškoršu koristili i niki evropski zajik, moraju malo i trenirat za budućnost. Adriana je baš after yesterday finila na kursu zajika, a naš Zvane je stori poliglota, da govori četiri zajika. Niki praviju da hi se zajno koristi, da vapi na njemački, kune talijonski, liže francuski i laže hrvocki. Kako je bi va kumpaniji z jenu damu, mislin da se je škivo od vapoja i kljetve, pa verujen da je koristi francuski i hrvocki. Adriana ni proteštala, bi reć da njoj je konvenjilo.

Benj, samo kako je Adriana Hadezeyska odletila, naš Zvane njoj je zi tla moho i zajno šiška na skup od Letuća, aš se ni smi va ovo vrime joko zamirit Letuću. Niki petešići su bili đeloži ča Zvane tako more motat se okoli Adriane, pa valje-valje teć h njin, ma ni bilo koristi, si Zvane ne do sakemu zapovidat. I tako su na kraji na sastanki Letuća si petehi potrdili slogu i priznali da je i Zvane  jedon od njih. Na kraji te bajke bi tribalo još dodat: “I živilo je tako Letuće dugo, složno i srićno na rados svojih podanika i celega hrvockega prevarenega puka“. Samo takovo ništo će napisat forši niki drugi, malo ozbiljniji kroničar od mene, a more bit da Letuće va međuvrimenu fini i va kakoven lonci za juhu. Jenu juhu već prontuju Mađari, a ćeli ju vonju hitit i jenega našega peteha, ćemo valje-valje vidit.

ADRIANA & BRUTO SLOVENSKY

Adriana se je joko dobro ove zadnje dvo leta složila z susedi, a najviše njoj je bi na srci i na uhi Bruto Slovensky. Pametimo njihove litrate na sih mogućih mestah, pametimo i njihof smih i bušivanje i iskrice zi očijah, a sada Merikani govore da je Bruto na šekreto pokle govori kako će bit grave ako Hrvocka fini va Evropi prvo Srbije i da to nikako nebi bilo dobro. Ma san govori ja vajka da mi je njigof smih nikako čudan i da mi spodobi da ima pod nos onu žensku stvor nopak obrnjenu, škužojte ma tako mi je spodobi ta njigof smih, ki nikako ni laškiva so ovo vrime. Sada mu se je ona stvor pod nos zaprla, aš su ga bandonali si va Slo-parlamenti, pa je od velega smiha - zustala mona ćavada.

Naši stori biju rekli da je „Mondo storen per kurbi“, eko san nazad malo zmišo zajike, škužojte – sejno verujen da ste me kapili. Zustala je tajna ako su Adriana i Bruto pomišali zajike, aš dolke su hi kamere snimale, smo vidili samo smih i bušiće, a kad se je luče zagosilo – to je njihova stvor, glavno je da su drugi don oba bili kuntenti.

ADRIANA & BO SRBIJONSKY

Kako smo se spretelili z našimi istočnimi susedi, od kako je Adriana Hadezeyska naslijedila Iveta – za ne verovat! Samo, mi se vidi da je Bo Srbijonsky igro na šegariju i da lesica kambijiva dlaku,  pamet ne. Kad mu je rendilo je odglumi kako na filmi da ga Evropa malo pofoli i da Srbija postane kandidat za Evropu, a oni put se je nazad torno na store staze, ne ove naše kršonske – ne daj Bože. Postavi se je nazad Bo kao balkanski policijot, pa je i našoj Adriani poče diljit lekcije i nikin ministron, kad su spominjali naše generale veterane Domovinskega rata. Nisan ga ču da je jenu besedu reka kad su njigovi ministri i sunarodnjaki počeli tužit branitelje Vukovara, a još su va ten rekli da te 1991. tamo ni postoja međunarodni sukob. Ča to znači nego nepriznavanje Hrvocke države i sadašnje granice? Nebin se torniva na njigof posjet Vukovaru, o temu san već piso, ali moran reć da nisan ču jenu njigovu dritu ni za Srebrenicu, Škabrnju i još čuda, čuda tega ča za ovu priliku nebin nanke nabrojo. Najčudnije je va ten kako je zajno dobi toliko podrške od onega haaškega suca. Ti ljudi kako da su se čera rodili ili njin je skleroza toliko napredovala da su va hip pozobili slike od pred petnajs-dvajset let.

Ja i Adriana se moremo složit okoli malo stvori va ovoj današnjoj Hrvockoj, ma ako bude takovoj politiki zi istoka pokozala rogi – ću njoj dat za pravo!

ADRIANA & VESNA

Nagledali smo se ove zadnje četiri leta kako se ženske prehtaju va Sabori. Adriana Hadezeyska najprvo kao vicepremjerka, a pokle i kao premjerka je najveću kontru imala od Vesne Pusić – vele zagovornice Evrope. Samo kako slovo Ć, va velih evropskih zajikih ne postoji i tu će naša Versna imat velega problema kad jeno jutri bude sedila va EU parlamenti. Neki govore da će oni put pred sobun imat tabelicu „Vesna Pussy“. Nisan se vadi ingleški, pa ne kapin tu njihovu gramatiku.