Od kada redovnici materjalno pretpostavljaju duhovnemu?

Pred desetak let san piso da je Sv. Anton (Pustinjak) dobi otkaz va Kršani i da su Kršonci za svoga zaštitnika u zamjenu zeli Sv Jakova, aš da je njegof prethodnik svoje župljane uporno pohodi po zimi, kad se ni moglo feštiđat na korunah i po vanih. Niki su se to vrime razjodili nome, aš da ni tako za pisat o temah Crikve, ma meni je bilo čudno da se tako ništo stori i san „misli na glos“.

Sada mi je još jena crikvena stvor još čudnija, pa bin reka dvi-tri besede. More bit da će se nazad niki nome jodit, ma bin zbisnu da ovu najnoviju stvor premučin.

Ja niki crikveni krugi su rekli da je slučaj „Dajla“ - „nutarnje crikveno pitanje“! Ta vela misal crikvenih dostojnika me je malo zbunila, aš, kada san ja hodi na lontrinu, su me vadili da Crikva ni ona „kuća“, kadi se vjernici moliju, nego da Crikvu čine svećenici, redovnici i vjernici – si skupa. Mislin da va Crikvi, kako konzervativnoj strukturi po ten pitanji ni bilo nič novega zadnjih let, pa po ten bi vjernici mogli izražavat svoje mišljenje o Dajli, posebi ča to ni samo crikveno pitanje, nego i čuda, čuda šire. Ja ću postavit još jeno pitanje: Kada bi kojin slučajen samostan va Dajli za sprovega bi tornon Benediktincen iz Praglie, jali ti frotri zi Praglie znoju kadi je Dajla i kuda biju do nje prišli? Drugo je pitanje, ali ne manje važno, a od kada ti redovnici ono materjalno pretpostavljaju duhovnemu? Ča nebi triba Papa takovu stvor presić na drugi način, a ne stavit se na bondu pohlepe Bojžih slugu i tu pohlepu označit kako grih. Da slučajno niki i reče tin frotron, na van, zamite si Dajlu – vaša je, a ča biju te sluge Bojže storile s tin samostanon? Verovat je da biju se tamo tornali, značilo bi da smo preveć naivni i lakovjerni, alora opet biju oni se to preprodali i ne znon kadi bi se tu mogli sagledat temelji vjere. Praviju da je geslo Benediktinci „ora et labora“, ča bi značilo „moli i delaj“, kada je iz tega njihovega gesla izostala beseda o materijalnoj komponenti njihove molitve i dela, ni meni poznato – pa ne bin tu temu širi.

Ja se ne bin tu bavi ni Osimskim, ni Rimskim sporazumima – o temu, s tega kuta neka govori struka, neka govoriju pravni stručnjaki. Ja moran reć besedu na temu kako je Papa podrža benediktince zi Praglie i kako je naš nadbiškup Bozanić to podrža.

Papa je pred por miseci bi tu poli nas – va Hrvockoj, si smo vidili koliko mu se je ljudi prišlo poklonit. Ja nisan hodi, ja se obično teško poklonin živemu čoviku, ma to sada i ni toliko važno. Siguran san anke da na primer Papa danas pride va Hrvocku – da bi mu se čuda manje ljudi klanjalo, nego pred por miseci! Ne znon ča mu je to tribalo, a ne zobimio papa je suspendira istrijonskega biškupa Milovana i to na por minuti, dokle niki Španjolac potpiše niku monadu, pa je biškupa Milovana torno na „vlast“. Moran reć da je to više nego licemjerno, aš ako je nikega gambijo – onda ga je mora na temu zustat, ovako je ofendi i našega biškupa i Istru i Hrvocku, aš je „taknu“ kus istrijonske i hrvocke zemljice, a to ni smi – koliko god on bi Papa, on je ipak samo rimski biškup i „svitski nadbiškup“. Kako je niki reka njegovo poslanje bila bi briga o duhovnoj bondi čovika.

Da se kapimo, ne mislin ja da se je trefilo ništo ki zna koliko strašno, Papa je samo pokozo da je čovik, a čovik je po kršćonsken nauki grišno stvorenje. Papa Woytila je blaženik na dobren puti da postane svetac, sadašnji papa verovatno to nikad neće postat. Baren do sada ni to nikako do nagovjestit. Kakovo je njigovo mišljenje o duhovnom i materjalnom, o temu je za razmišljat, nakon ovih zadnjih događajih – kad god budemo gledali mašu zi Trga Sv. Petra.

Pustimo sada Papu, meni je joko čudno ča je na dokument o vraćanju Dajle talijonskin Benediktincima potpis do i hrvocki kardinal Bozanić. Ponovo govorin o jenemu crkivenemu dostojniku, ja običan moli čovik, ali ja se smatran kako kušćić Petrove crikve. Mislin da Bozaniću to ni tribalo. Opet je i on pokozo svoj odnos prema materijalnemu, kad je va ovoj mižeriji zido dvore na Kaptoli. Znon i da se već dugo govori da će on poć va Vatikan, ma mi se vidi da je z ovin potezon poništi povratnu kartu. Cela bi Hrvocka bila kuntenta imat svojega jokega čovika blizu Pape, ali jedini sobun ne more za dotu zet kus zemlje, kako je to Bozanić sada pravo storit.

Čuda vrimena smo čekali da se naš kardinal jovi s kakovu besedu o temi za ku je prozivan, a kad smo i to dočekali, on je prozbori nikin potpuno nerazumljivin zajikon i za hrvocki puk i za Crikvu. Najprvo je seh pozva da mučiju, a onda je reka da oni ki o Dajli govore, da govore z mržnju prema Papi. Ne znon kako jedon crikveni dostojnik more i smi bit tako i toliko isključiv. Opet ćeju me niki prozvat, ma mislin da si je z ovu prediku Bozanić do autogol i da je definitivno zgubi utakmicu va Hrvockoj. On more storit ne znon kakovu karijeru va Vatikanu, ma doma ćeju ga zapametit po nečen drugen. S takovin postupkon Bozanić je na  jedan autoritaran način pravo opravdat somoga sebe, a pozivanje na Papu je opet samo znak očaja velega grišnika. Autoritet već dugo nima, pa je ta njigof istup izgleda pomalo tužno i žalosno. Pokle se ove afere ja samo nisan joko sigur ako je tu va điru biškupija ili biš kupija?

Samo beseda-dvi o istrijonskemu svećenstvu. Bin reka samo krotko – saka čos! Svećenstvo je va teških momentih kroz povijes znalo bit uz narod, tako su nan zustali na mentih  Strossmayer, Dobrila, Milanović… sada Jakovljević, ali i si svećenici va Istri.

Zato najprvo da rečen, moj naklon semu istrijonskemu svećenstvu, aš su kako jedon rekli da je Dajla naša. Pokle hi je Bozanić ušutka, njemu na čos, nadbiškup Bogović i don Grubišić  sejno su svoju besedu rivali dat javnosti, a rivo je to i kancelar Biškupije porečke i pulske Ilija Jakovljević, kako ga je niki nazva – Ilija Gromovnik. Ovega zadnje spomenutega je to koštalo funkcije, a verovatno i jene značajne karijere.

Ako se vera potvrđuje žrtvom – Jakovljević je svoju veru potrdi. Da ga je biškup Milovan zaštiti, bi bi i on posta besmrtan i čašćen, ali je nakon malo vrimena biškup posusti i gambijo svoga kancelara, zato je provi heroj posta biškupof kancelar Ilija Jakovljević (Gromovnik). On je, prez obzira na mladost i obećavajuću karijeru, vrlo jasno i na glos reka svoje, a ča se Vatikanu (čitaj Bozaniću) ni pježalo. Jakovljević je gambijon, ali zato po soj Istri more prošećat i sakega od Istrijani more mirne duše i čiste savjesti pogledat va oči, a kako će Istrijane gledat Bozanić i kako ćeju Istrijani, ali i općenito ljudi va Hrvockoj njega gledat, ne bin sada analizira – neka gre on samo va ti njigof  Vatikan, ma sobun neka zame svoju dotu, ku si je som pronto i neka tamo uživa, mi ćemo pasat i prez njega. (Klaudijo Lazarić)