Lavativi proteštivaju, estradnjaci prite, samo sirotinja ne kuka   

Mislin si samo kolikin san sto na rep s prethodnin člankom, ono o disciplini ponašanja va vrime covid krize, o zaprtin oštarijan, kafićima…

Jedini ne protestira da se neće održat sajam knjiga

Ni me joko ni briga – neka ćikoju! Nego san šo za tin da jedini ne protestira da se neće održat sajam knjiga, verovatno imaju ljudi i pravo – prez knjige se more i ni nika naročita navala na nju, a prez kafe, bire i gemišta teško je zamislit don!

Ja pravivan nike stvori povezat i kapit, zaprta oštarija je škoda za gazdu, jer ideja je da se ništo zasluži i da si život svojin delon storimo lipčim i ugodnijin – to je normalno razmišljanje i niki za to ne smi zamirit. Takova logika je OK za normalno vrime, ma ovo današnje mi na to ne spodobi.

Trefila nas je ta nesrića od bolesti ka se širi i od ke se moramo obronit kako god znomo. Va vrime nesriće čovik bi mora postat osjećaniji, humaniji, solidarniji – nebimo smili gledat samo svoju guzicu. Na žalos, nisan više siguran da te besede, solidarnos i humanos više nanke va školskih riječnikih postoje. Govorin to zboh onega ča saki don čujemo i vidimo, va okruženji i na TV.

Gledali smo si ove dneve kako su niki marširali prez maske, kako su drugi proteštivali protiv maski, protiv ograničenja okupljanja, proti zapiranja lokala…

Niki su opravdavali takovo ponašanje gubitkom zarade, drugi guštom druženja i ispijanja kolektivne kave, drugi opet tumače da je virus izmišljen, da ni opasnosti, da je se prenapuhano… Uglavnom saki nastoji noć škužu i opravdat svoju glupost, nedostatak kulture, manjak zdravog razmišljanja. Opet mislin si kemu prkose ti ljude? Meni, stožeru, Vladi, medicinskemu osoblju? Ma vraga - to je samo oholija, čin ih boles zakači, sigur san da se pretvore va običnega mićega plizavca i moli mediga – pils, plis.

Ča ti demonstranti nimaju milosti prema medicinskom osoblju

Meni se vidi da jedini ki današnje vrime imaju pravo na prosvjed je kompletno medicinsko osoblje, pa se do nacionalnega stožera CZ i ministra zdrovlja. Dosta je pogledat TV i osoblje bilo ke bolnice obučeno kao svemirci i takovi po cele dneve teku okoli pacijenata kih je se više i više. Ča ti naši 'supermeni'- demonstranti nimaju milosti prema temu osoblju od kega ćeju forši jutri imat potribe? Dali ti naši 'protestanti' ili kako bin ja reka lavativi i đabalebaroši, ki po cele dneve proteštuju i škivičiju, proti maski, okupljanja i ne znan proti čega se ne, daš ne znoju kamo z guzicu – misliju na te bolničke ekipe, kako i pod kin uvjetima žive i delaju i da hip, na hip i oni somi moru pasat bolnički prah i iskat pomoć od teh sejnih ljudi ki ih sakodnevno mole i upozoravaju da se od ničega suzdrže, da shvate koliko je situacija ozbiljna.

Ako stvarno to ne shvate i tako ne razmisle – verovatno i nimaju s čin razmišljat, onda njin i ja opraštan.

Estrada, ja cela bogovita domoća estrada, pa i naša istrijonska 'svića' va toj estradi kuka kako celo leto nisu održali nego jedon ili dvo koncerta, kako se slabo živi… Neka ih sih skupa srom bude – pa saki njihov koncert 'valjo' desetine miljari euri! Z njimi ne robi gubit vrime, ni posluhat ih – neka sopeju i kantoju somi sebi! Neka se domisliju svojih suseljana ki jedan euro nisu nikad vidili, za kih je mjerilo vrijednosti FETA KRUHA.

Pozitivan primjer Deana Dvornika

Ja san ipak naša i jedon pozitivan primjer. Dean Dvornik je shvati vrime va ken živimo i čujen da pelje kamion va Chicagi – čovik ne plače, ne kuka, ne roni suze – nego dela! Bravo Dean!

Opet va soj nesrići ka nas je snašla, samo sirotinja ne plače, ne kuka, ne demonstrira i ne priti svojin budućim potezima. Za sirotinju baš jedini ne zno, jedinega i ne briga, sirotinja – pa i Bogu si teška.

Ki je va ovoj situaciji spomenu ljude zi prove margine, one ki ne planiraju jutri, nego kad jutri pride pokušavaju preživit – ako to jutri rivoju dočekat? Kega briga za one ki ne znoju ča je to jutarnje kafe, ča je to bira, gemišt… kega? Kega brigaju oni ki ne da njin je frižider prozan, nego ga i nimaju? Ki je sponmenu one ki kopaju po kontejnerih da bi našli koricu suhega kruha? Kega brigaju oni ki ćeju se po zimi, ka nan se približava, smrzavat va niken haustori, na česti ili va nikoj zavjetrini kadi su se trenutno stisnuli, daš vlastiti krov nad glovu nimaju?

Ne, ne, ne - su tu sirotinju ni jedini spomenu i na njih se jedini ni ni domisli… a čuda naših moćnika raznih koluri se križa, i blagoslivlja i glumi svece va ovo predblagdanske dneve – Boh njin grihe prosti. 

Ja opet pitan, kadi je solidarnost i humanost, ča se ki domisli ča te dvi besede značiju? Nemojte to shvatit kako niko bezvezno moraliziranje ili ne daj Boh lažno samaritanstvo. Ja vidin i one ki ne rivoju pred TV kamere, ki ne dižu bunu, ki ne proteštuju nego svoje siromaštvo nose dostojanstveno, jedinega nič ne pitaju ni ne mole, a pitanje je dali su za stanje va ko su prišli baš somi oni krivi.

Zato bimo morali, prvo nego mohat z bandjerami, švikat i marširat za biru, gemišt, kafe… prvo nego plakat nad sudbinom vlastite guzice – shvatit da je čuda, čuda naših poznanika i brižnih, čuda sirotinje ku bi mrvice z našega stola usrećile – domislimo se baren va ovo vrime i do njih, a namesto da kupimo švik za švikat na placi – kupimo fetu kruha za one ken ona život znači. (Klaudijo Lazarić)