Klaudijo Lazarić: Na referendumu ću glasat – za!

Da počnen ovi put malo na škerac. Va ove našen modernen društvi i vrimeni, naši vrli Istrijani Mote i Sipe su bili pederi i kako su oni ostvarili sva svoja „manjinska“ prava, oni su stekli pravo usvojit dite  i tako su oni usvojili molega Jožeta.

Jedan don kad se je „otac“ kupa, moli Jože je uleti va kupatilo i kad je vidi „oca“ onako golega, inkanton je reka:„Ćaća ma ti imaš velu pucu…!“ Ćaća Mote sejno inkanton ča je otrok doleti va kupatilo, se je na brzinu snaša i odgovori: „Ja, ja sine, ma da vidiš kakof kus puce ima tek mama.“

MOTE I SIPE PEDERI

Eko još jedon, na sejnu temu. Novo vrime je doneslo čuda novih besedah, ke se tradicionalno ni koristilo, pa niki nisu ni znali ča te besede značiju. Tako je Bepo reka Jožetu, da je bi niki don va grodi i da je se zaredon ču besedu, za ku ne zno ča znači, pa je pito Jožeta ča je to - peder, aš je to bila beseda ku je va jenen dnevi ču baren sto puti.  Jože, onako rigvardoš, ni zno kako bi pretelu najjednostavnije objasni ča to znači, a da ne bude grub i bezobrazan mu je reka: „Bepo moj, kako bin ti reka, ma to ti je ono kad ti niki hodiju z muškimi - znoš.“

Kad je brižan Bepo to ču, se je ćapo za glovu i reka: „E moj Jože, fala ti velo, ja do sada nisan zno ča je peder, a se leta iman pedera va kući.“  Jože se je opet začudi i popito Bebeta da kako je to moguće, pa njigof moli Franić još nima ni leta za poć va školu, da ni valja tako moli otrok šo k vragun.

Brižan Jože je baretu nagnu skroz na čelo, skoro je pokri oči z nju i onako mučan promrmlja skroz zube: “Ne, moj Bepo - ne, nisan misli na molega Franića – otrok je trdo va reguli, a još je i premold za takove štupidece – ni još nanke va školu poče, misli san ja na moju Fumu, Bepo moj – ako je to ča mi ti govoriš, onda je moja Fuma peder fitivi.“

Kako ove dneve imamo i referendum na temu ku san nače, da nastavin. Portila je kampanja da  referendum diskriminira manjinu ku su formirali pederi i lezbe. Da me nebi niki slabo kapi, ne mislin s timi nazivi jedinega ufendit, niman nič proti jedinega – saki ima svoj izbor, ja znon samo ta dvo naziva i njih koristin.

San uti reć da se meni sejno više pježo mama Fuma od mame Sipeta, ka ima još i velu pucu. Iako je glasanje tajno, si batići su već pravili za ča ćeju glasat, škužojte ča san i ja to stori - a nisan batić. Ja ću glasat da se Bepo s pucu oženi s Fumu s piku, pa magari si jedon drugemu celi život rogi nabijali – to su njihove stvori. Ja pak mislin da su lezbe naletile na vrime na „mamu“ Sipeta z velu pucu – siguro više nebi bile lezbe, hehe.

UGROŽENA VEĆINA

Sada je problem ča su se „ovi“  proglasili „manjinom“ i žaliju se da su kako manjina ugrožena. Ja pak mislin da su prava većine ugrožena, eko i zoč. Normalni ljudi se ne smiju nanke malo bolje stisnut ili bušnut na česti, a ova „manjina“ organizira niki Pride, pa se si ukriž sline i ljubakaju i ne znon ča se ne delaju na sred česte i još guštiraju da hi se snima. Meni to nebi smetalo kad biju delali doma i va zaprten, magar va kondoti, ma ovako… hebi ga, ni hi lipo vidit i Boh. Sciffo, e basta!

Eko jenega primjera kako se mi pomašamo prema - većini. Pred nikoliko let je na niken našen otoki va letnje vrime, jedon naš diretor javnega poduzeća na dvi i pol ure zad pol noći na pergoli od vikendice brusi jenu lipu mladošćicu. Jedan novinar ga je čeka pod pergulu, slika ga i to do va javnos. Pokrenula se je cela hajka s ciljen da se čovik smjeni s dela kega je dela i to ne ča je slabo dela svoje delo, nego ča je va to i to doba brusi…

Tako je i moja malenkos bila na jenen sastanki kadi su niki provali tako postavit stvori, okrivit čovika ča je na dvi i polure zad pol noći brusi na pergoli od vikendice.  Ja još vajka nisan rivo kapit, dali ni bila ura za brusit, dali su računali da se je čovik preforco, pa će delo drugi don patit ili pak ni bila pergola za takova „dela“ predviđena, ni bila dovoljno sigura pa je valja postojala opasnos da se taraca zruši… Ja san si samo misli da  bi bilo bolje da san ja na njegoven mesti, bi san malo đeloš – to je normalno, mi se vidi.

Jedini se ni naša pitat novinara ča na tu dobu noći dela va ljučken vrti i zoč smeta dvo normalna Bojža stvorenja u uzvišenom trenutku ljubavnog zanosa. Mi smo očito šli na ocat, kao društvo – se ono ča je normalno, poli nas jednostavno ne valjo i obrnuto – se ča je nopačnija stvor, mi je raji prihvatimo.

Ča san vas uti pitat, ki je tu ugrožen – ča oni ki va svojoj vikendici usred škure noći brusi po Bojžin pravilima ili ovi ki se po sred groda na niken Pride žvaliju ki kega rivo i nabijaju normalnemu svitu svoju guzičinu na nos? Ako se mene pita bolje da GRE nego da PRIDE!

KRIZA

Beseda ku zadnjih let čujemo je sakako kriza i receija. Kada god vlast misli da bi narod moga ništo pitat i pobunit se – samo nas domisli da živimo u vrimenu krize i recesije. Ka van rečeju „kriza“ - to bi značilo da budemo kuco, aš vajka more bit i huje. Kad van rečeju da je i recesija, to bi van značilo da je kriza na niku ne znon ni ku potenciju, alora nanka „A“ molin.

Ja se mislin, kriza, recesija – kadi je i za kega? Po sviti vidin se puno glamura, krvovih tapedi, šminkeraja, kadi je saki don se više blještavila – na drugen kraji svita saki don se više lačnih ljudi, dice ki umiru od gloda…

Kriza, kadi je krize? Poli nas? Saki don čujemo kako su nikega uhitili, aš je ta i ta pokro i zaje.. toliko i toliko… Tako da ljude, ken se je sa Hrvocka do čera divila i klanjala njin se – ki su vedrili i obločili po celoj državi let i let, najedanput svitlo gledaju na rige, skroz rešetke Remetinca. Za njih i njihove do sada krize ni bilo!

Meni se sejno vidi da ti naši moderni uskoki provivaju dokazat da su oni provi nekadanji uskoki bili leni i puni fjake – po dalmatinski. Koliko njin samo triba vrimena i let da bi nike ljude va ovoj brižnoj Hrvockoj „pitali za zdrovlje“. Sirotinja ne smi bit jedinemu dužna jenu lipicu, a nike „vele zvjerke“ državi moru bit dužni miljune, moru prelivat zi državne „šterne“ va svoje žepe koliko hi je volja i to delat let i let, moru drapat i drapat na se kraje….

BAHATOST I RASTROŠNOST

Opet gledan nika ministarstva i nike županije, opet gledan one ljude i političare ki sebe nazivaju demokratima i socijalistima, gledan one, ki bi baš tribali bit socijalno osjetljivi i ki bi tribali znat osluhnut bilo naroda – baš su oni pokozali su svoju bahatost i aroganciju. I va ovo brižno vrime krize, vrime ko će narod pametit samo po svojoj mižeriji i licemjerju i aroganciji moćnika – ki kupuju najmodrnije nove veture i još nas uvjeravaju da su zašporali toliko i toliko... Zapravo ja mislin da nan se si oni rugaju, a imaju i pravo, aš smo njin to pravo baš mi doli. Baš smo hi mi zibrli i tamo postavili, pa zi tega crpiju svoju forcu i moć.

I da pomalo zaključin. Po sviti je svega i svačega i kad bi se šoldi ki se troše za vojsku, naoružanje, za uništavanje i tiraniju potrošilo pametno – jedini na ovoj kugli zemaljskoj nebi bi lačan ni žedan.

Opet, kad bi se naše domoće dugoprstiće ogulilo i dolo narodu narodno, se ča su dugoprstići pokrali i pronevjerili – Hrvocka bi bila bogata zemlja, a svoj bi duh lahko tornala.

Postoji samo jena stvor ka se je spustila niže od naših političara i vlastodržaca – to su sindikalni batići, ki orgijaju nad sudbinon brižnega puka. Poglejte hi, kako pijavice se zaljepe za sakega kega je sila prilika natirala da se ništo buni i protestira. Istovremeno o vlastitemu statusu nisu nikad besedu rekli – sikira njin je va medi, nimajte stroha.

Ljudi moji, poli nas je sega, samo pameti fali, ako stvarno poli nas postoji kriza - onda je to samo – kriza morala. (Klaudio Lazarić)