Klaudijo Lazarić: Još dvi, tri besede o Milanoviću
San misli pustit ga ma miri i ne više spominjat, mislin da i ne zaslužuje moju pažnju, ali ni pažnju običnega molega čovik uopće…, ali čera je bila jena kontakt emisija na nikemu radiju i ja san pol ure čeka i uporno zaziva i zvoni i nikako nisan priša na red, a redali su se slušatelji kako na traki. Interesantno samo je jedan Zokijev oponent rivo reć besedu…, pa ako smin tu još dvi besede.
Čujemo sakodnevno kako Precjednik nabraja s koliko je glosi dobi izbore kad je bi premijer i šepuri se kako je dobi duplo od sadašnjega premijera. Ne moren nič reć, ne vodin tu statistiku, ali moga je reć i koliko je njegova Partija zgubila va njegoven mandati i koliko posto je dobila nakon njegovih četire leta. To bi bi pokazatelj pokazatelj njegovega mandata i to bi bila njegova zasluga, ma mu je krotko duralo i je zajno druge izbore zgubi – to je njegova zasluga i rezultat. Moga je nabrojit i koliko je zemlju zaduži i koliko je bilo zgubljenih radnih mesti. Mi se vidi da je baš va ten vrimeni bi rekord. Nego on laglje nastavlja svoj monolog pred medijima, pa govori semu i sačemu…o Hrvatskom proljeću, o Udbi, o semu i svačemu ča ga pitaju i ne pitaju – tako da slušatelj stekne dojam da ON baš se zno, čak ga ne triba nič ni pitat, samo ga stavite pred mikrofon i on van se pravi kako tranzistor. More bit da će uskoro i prognozu vrimena uvest u svoje obraćanje.
Foli se čovik i svojim iskustvom va politiki i diplomaciji. Ono iskustvo va politiki, to bi van bilo iskustvo va prodaji magle, ima je On još dosta na zalihi i sakodnevno nan nudi nove i nove količine. Ono o diplomaciji… ako je takov rječnik, kakov koristi va domoćoj komunikaciji koristi va Briseli – saka čos ki ga je temu navadi i ki ga je tamo takovega trpi, daš besede ke koristi bi više spadale va neki kočijaški rječnik, nego va državnički, s tin da nebin uti ofendit jedinega kočijaša. Njigova dipolmacija, demokracija, a i kohabitacija mogla bi se sves va jenu rečenicu: „Ćemo se dogovorit da bude se po moje!“ Čovik se je očito trefi z svoju sliku va špeglji i od tega dalje ne more uć. Ogledalce mu je zajno reklo da je ON najbolji, najlipči i najpametniji! To je za njega početak i kroj štorije!
Najhuji premijer i najhuji precjednik
Precjednik države bi mora bit najprvo državnik, samo poli njega ne vidin nanke jenu državničku osobinu, ni va ponašanju, ni va njegovoj komunikaciji – ni doma, ni od zdomi! Ovo ča dela i govori z dneva va don, nan je sin samo na sramotu. Ča je državnički forši precjednika Sabora zvat Njonjo, ovako javno i pred Sviton? Ča to su besede za javnost? Ostale nebuloze i uvrede ke dilji se okoli sebe i s kimi se rashićiva bolje i ne spominjat.
Kako se samo zlurado šepuri kao paun daš je sigur da va Sabori ni dosta rukic za njegov opoziv za kega triba dvotrećinska većina. Baš mu je to niki argument, pa ako ga to veseli – kuraju Precjedniče. Meni se vidi da je dosta i da se ozbiljno spomene som opoziv – kad znomo da do sada se nikad va našen parlamenti ni govorilo, vas so vrime, a on je već peti po redi na Pantovčaki. Ma neka tamo i zustane, ja bin mu zapra lesu, da ne more vani nake kad bi uti. Jeno je sigurno, kako je pasalo to leto i ništo njegovega mandata već je vidit da će do kraja bit i najhuji od sih dosadašnjih precjedinki. Bit će jedinstven z dvi medalje, za najhujega premijera i za najhujega precjednika! (Klaudijo Lazarić)
