Živi nan vječno druže Nino
Nino je proslavi dvajset let na čeli IDS-a, saka čos – takovi su retki. Mislin da ga samo Castro i Kim Jong Il šiju. Fešta za tu priliku bila je kako dolikuje velemu vođi, torta s kandelami pred čuda okupljenih čestitari. Fali je samo jedon slet, kako smo to zvoli kad se je održava na stadioni JNA. Istina, ni mu za ovi put službeno predana štafeta, ma su se čitala pozdravna pisma, a jena trenutno vela batica va stranki je reka da je pred dvajset let bi još moli otročić, ma ga je već oni put veliki vođa oduševi. Na kraji je samo falilo ono: Živio nam vječno naš druže Nino! Ni rečeno da se va najskorije vrime neće organizirat štafetna trka po celoj Istri s palicu - zad simi ki misliju drugošlje od voljenog vođe.
Za sada, anke Kajin je nafoli šefa do mile volje, bit će da je i naš Damir šo va diplomaciju, aš do sada pametimo njegovu zasin drugošlju retoriku. Govori je ta don anke oni barba ki je Nineta primi va Seistarsku stranku, ma njemu se je Nino oduži davno, Barba Miro je dobi „Mih“, a ta „instrument“ sope za 10 sih ovih let. Ja, nikako mi je po na pamet oni film „Otac na službenom putu“, pa pomalo koliko je oci bilo na „službenen“ puti i ni rivalo Ninetu dat ruku i čestitat. Nisan šo propijo za tin, ma Delbianco, pok.Martinčić, Pauletta, Žufić, Debeljuh, Maras, Klapčić, Blečić i još niki su fato baš ti don bili na „službenen puti“.
Som Nino je reka da je još oni put pred dvajset let bi dalekovidan, ne znon zoč to do sada ni riješi - va nikoj od naših klinika to na današnji don ni nikakof problem. Govori je on pre tih dvajset let i o autonomiji i o ekologiji. Preveć je ljudi va te leta poumiralo, a od te autonomije nisu rivali nič vidit, a ako pojemo va tu vrajžu Evropu, ni od Hrvocke ne bude nič, a kamo li će niki tamo mislit za istrijonsku autonomiju. Zato je na ekološkom planu naš Nino ostvari neverovatan rezultat, pa će Rockwool zustat vječni spomenik njegovih ekoloških uspješnih projekti. (Klaudijo Lazarić)
